Bu barədə “The Wall Street Journal” qəzeti məlumat yayıb.

Proqramın büdcəsi 6 milyard dollar həcmində qiymətləndirilir. Pentaqon bu məbləğə 1000 pilotsuz qırıcı sifariş etməyi gözləyir və yüzlərlə belə dron yaxın 5 il ərzində ABŞ Hərbi Hava Qüvvələrinin xidmətinə daxil ola bilər.

Amerikanın müdafiə departamenti ilə müqavilə üçün mübarizə aparan şirkətlər arasında “Anduril Industries”, “Boeing”, “General Atomics”, “Lockheed Martin” və “Northrop Grumman” da var.

Plan pilotsuz qırıcılar vasitəsilə F-35 qırıcıları və B-21 bombardmançıları kimi ekipajlı təyyarələri müşayiət etmək və mühafizə etməkdir. Bundan əlavə, onlar öz silahlarını daşıya, yerdəki digər təyyarələrə və hədəflərə zərbələr endirə, həmçinin kəşfiyyat funksiyalarını yerinə yetirə biləcəklər.

ABŞ ordusunun pilotsuz texnologiya və süni intellektdən istifadəni artırmaq qərarına səbəb pilotlar tərəfindən idarə olunan standart hərbi təyyarələrin yaradılmasının yüksək xərclərə başa gəlməsidir.

Nəşr qeyd edir ki, pilotsuz təyyarələrdən istifadə etməklə, Pentaqon 1947-ci ildən bəri ən aşağı səviyyəyə düşən Hərbi Hava Qüvvələrini gücləndirmək istəyir.