Press-fakt.com “Reuters” agentliyinə istinadla xəbər verir ki, bu barədə ABŞ Mərkəzi Komandanlığı (CENTCOM) məlumat yayıb.

“Martın 6-da Səna vaxtı ilə təxminən saat 11:30-da (Bakı vaxtı ilə saat 12.30-da) Ədən körfəzində Barbados bayrağı altında üzən Liberiyanın “True Confidence” gəmisinə Yəmənin husilərin nəzarətində olan ərazisindən gəmi əleyhinə ballistik raket buraxılıb”, - məlumatda bildirilib.

Komandanlıq təsdiqləyib ki, gəmiyə hücum nəticəsində üç nəfər ölüb, üçü ağır olmaqla ən azı dörd nəfər yaralanıb.

Agentliyin məlumatına görə, gəmidə müxtəlif millətlərdən olan 20 dənizçi və üç mühafizəçi olub. Husilərin hücumundan sonra gəmiyə ciddi ziyan dəyib və ekipajın əksəriyyətinin yeri məlum deyil.

İngiltərə Dəniz Ticarət Təşkilatından verilən məlumata görə, ekipaj hadisədən dərhal sonra gəmini tərk edib.

Yük gəmisinə hücum Yəmənin Ədən limanı sahillərindən 50 dəniz mili aralıda baş verib. Husi sözçüsü Yəhya Sariya ekipajın xəbərdarlıqlara məhəl qoymamasından sonra “True Confidens”in gəmi əleyhinə raketlərlə hücuma məruz qaldığını iddia edib. 

Onun sözlərinə görə, hücumda bir neçə gəmi əleyhinə raketdən istifadə edilib. Zərbələr dəqiq olub və nəticədə gəmidə yanğın başlayıb.

Beləliklə, “True Confidens”in gəmisinə atılan raket də daxil olmaqla husilər tərəfindən atılan gəmi əleyhinə ballistik raketlərin sayı son iki gündə 5-ə çatıb.

Qeyd edək ki, husilər 2023-cü ilin noyabrında Qırmızı dənizdə gəmilərə hücum etməyə başlayıblar. Onlar həmçinin pilotsuz təyyarələr və gəmi əleyhinə raketlərdən istifadə etməklə Qırmızı dənizdə ABŞ-nin iki esminesinə zərbə endirdiklərini bildiriblər.

Xatırladaq ki, ”Ənsar Allah” öz hərəkətlərini İsraillə münaqişədə HƏMAS-ı dəstəkləmək kimi əsaslandırır və onun potensial hədəflərinin yalnız İsrail gəmiləri olduğunu bildirir.