Xəbər verildiyi kimi, Qərb mətbuatının yazdığına görə, Ukrayna Silahlı Qüvvələrinin Baş komandanı Valeri Zalujnı bazar ertəsi, yanvarın 29-da Prezident Ofisinə çağırılıb və vəzifəsindən azad edilməsi barədə məlumatlandırılıb. 
Ancaq bununla bağlı rəsmi sərəncam hələ də verilməyib.
“CNN” bu məsələ ilə bağlı yeni məlumatlar dərc edib. Xəbərdə iddia olunur ki, Zalujnının istefaya göndərilməsi ilə bağlı Prezidentin sərəncamı həftənin sonuna qədər elan olunacaq.
Qeyd olunur ki, Zalujnı ilə dövlət başçısı Volodimir Zelenski arasında gərginlik xüsusilə generalın noyabrda “The Economist”ə verdiyi müsahibədə Rusiya ilə müharibənin dalana dirənməsinə dair açıqlaması ilə daha da artıb.
Lakin o da qeyd olunmalıdır ki, Prezidentin mətbuat katibi Sergey Nikiforov Baş komandanın vəzifəsindən azad edilməsi ilə bağlı şayiələrin həqiqətə uyğun olmadığını vurğulayıb. Müdafiə Nazirliyi də bunun doğru olmadığını bildirib. 

Eyni zamanda, Zelenski özü bazar ertəsi gündəlik axşam çıxışında Zalujnı barədə ümumiyyətlə, danışmayıb.

Bununla yanaşı, “CNN”-in bildirdiyinə görə, bazar ertəsi Prezident Ofisində Müdafiə naziri Rustem Umerovun da iştirak etdiyi kiçik iclasda Prezident Zalujnının Silahlı Qüvvələrin Baş komandanı vəzifəsindən azad edilməsinə qərar verdiyini deyib.

Zelenski Zalujnıya başqa vəzifə təklif etsə də, general bundan imtina edib. Sonra dövlət başçısı vurğulayıb ki, yeni iş təklifinin rədd edilməsi hazırkı vəzifədən uzaqlaşdırılma faktını dəyişməyəcək.

“CNN” əlavə şərh üçün Prezident Ofisi ilə əlaqə saxlasa da, suallarına cavab almayıb. Qeyd edildiyi kimi, indi Zalujnının mümkün varisi barədə iki variant var.

Bunlar Müdafiə Nazirliyinin Baş Kəşfiyyat İdarəsinin hazırkı rəhbəri Kirill Budanov və Ukrayna Quru Qoşunlarının komandanı Aleksandr Sırskidir.

Bu arada Prezident Ofisi rəhbərinin müşaviri Mixail Podolyak bildirib ki, Prezidentin səlahiyyətlərinin müzakirəyə çıxarılması doğru deyil və bu məlumatlara ictimai reaksiya ona “qəribə görünür”: "Bu, müzakirə oluna bilərmi? Mənim üçün qəribə görünür. Yenə də bu, Prezidentin səlahiyyətidir.

O, Prezidentin meneceridir - mən ümumiyyətlə, baş komandanı nəzərdə tuturam. Təbii ki, Prezident tabeliyində olanlarla müəyyən münasibət qura, onların qarşısına müəyyən tapşırıqlar qoya, müəyyən nəticələr əldə edə, bu nəticələri dəyərləndirə bilər və s. Bu, siyasi proses deyil, siyasi rəqabət deyil, bu müharibədir”.