“News.am” portalı xəbər verir ki, yazışmalar 14 noyabr 2021-ci il tarixində “Whatsapp” vasitəsilə aparılıb.

Belə ki, Paşinyan noyabrın 14-də səhər keçmiş müdafiə naziri Arşak Karapetyandan sərhəddəki vəziyyəti soruşduğunu bildirib. Eks nazir isə ona sərhəddə hər şeyin sakit olduğunu bildirib. 

Bununla da Paşinyan keçmiş müdafiə nazirinin ona Azərbaycan qoşunlarının Ermənistan istiqamətində hərəkəti barədə məlumat verməməkdə, həmçinin heç bir tədbir görməməkdə ittiham edib.

“Mən noyabrın 14-də Dubayda idim, orada çox mühüm görüş nəzərdə tutulurdu”, - deyə Arşak Karapetyan Paşinyana cavab verib.

“Bizim silahların alınması və idxal edilməsi ilə bağlı problemlərimiz var idi və mənim cənab baş nazirə sərhəddəki vəziyyətlə bağlı məlumat verməyə fiziki imkanım yox idi”, - deyə sabiq nazir bildirib.

Paşinyan isə Karapetyanın bu bəyanatından sonra keçmiş müdafiə nazirinin 2021-ci il noyabrın 14-də səhər saat 09:38-də göndərdiyi səsli mesajı yayıb və orada keçmiş nazir ona hər şeyin qaydasında olduğunu deyib.

Sonra Karapetyan saat 16:12-də artıq əlaqə saxlamağı dayandırıb və baş nazir ona silsilə mesajlar yazıb: “Ciddi söhbət aparmalıyıq”, “Siz ictimaiyyət qarşısında izahat verməlisiniz”, “Nə baş verib?”

“Burada iki variant var - Arşak Karapetyan müdafiə naziri olanda ya məsələdən xəbəri olmayıb, ya da xəbəri olduğu halda mənə məlumat verməyib. Belə vəziyyətlərdə mən bu postda heç kimi hətta yarım saat belə saxlaya bilməzdim”, - deyə Nikol Paşinyan yayılan videoda bildirib.

Qeyd edək ki, 2021-ci ilin noyabrın 16-da dövlət sərhədində Ermənistanın təxribatları nəticəsində baş verən döyüş əməliyyatları zamanı Azərbaycan Ordusu yeddi şəhid verib. Döyüşlərdə 10 nəfər hərbi qulluqçumuz yaralanıb.