Bunu Azərbaycanın AŞPA-dakı nümayəndə heyətinin səlahiyyətlərinin məhdudlaşdırılması ilə bağlı təşəbbüsün müəllifi, almaniyalı deputat Frank Şvabe “Abzas Media”ya açıqlaması zamanı deyib.

“Parlament Assambleyasında əsas olan bir qayda var. Bizə vəziyyəti yerində monitorinq etmək üçün Azərbaycana səfər etməyə icazə verilməlidir. 

Baxaq görək, həbsxanalarda vəziyyət necədir? Seçkilər necə keçir? 45 üzv ölkənin hər biri buna şərait yaradır, bir ölkədən başqa. Bu da Azərbaycandır. 

Buna görə də, o, Avropa Şurasının bərabərhüquqlu üzvü ola bilməz. Buna görə də, “stop” siqnalı tətbiq etdik. Hadisələrin necə cərəyan edəcəyini görəcəyik”, - Şvabe bildirib.

Xatırladaq ki, bu il yanvarın 25-də Avropa Şurası Parlament Assambleyası (AŞPA) Azərbaycanın 20 il əvvəl Avropa Şurasına daxil olmasından irəli gələn əsas öhdəlikləri yerinə yetirmədiyi qənaətinə gələrək Azərbaycan nümayəndə heyətinin etimadnaməsini ratifikasiya etməmək barədə qərar qəbul edib. 

Bir gün əvvəl isə Azərbaycanın AŞPA-dakı nümayəndə heyəti bəyanatla çıxış edib və AŞPA-da mövcud olan dözülməz irqçilik, Azərbaycanofobiya və İslamofobiya mühiti əsas gətirilərək Azərbaycan nümayəndə heyətinin AŞPA ilə əməkdaşlığının və təşkilatda iştirakınının qeyri-müəyyən müddətə dayandırıldığı bildirilib.