Xarici KİV-lər xəbər verir ki, yanvarın 22-də ABŞ Ali Məhkəməsi qubernator Qreq Abbottun miqrant axınına qarşı mübarizəsi çərçivəsində Texasda ABŞ-Meksika sərhədində quraşdırılmış 30 mil (təxminən 48 km) məftilli hasarın sökülməsinə qərar verib.

Texas Milli Qvardiyası isə federal sərhədçilərin Rio-Qrande çayı boyunca Meksika ilə sərhədin bir hissəsinə (təxminən 4 km uzunluğunda) girişinin qarşısını alıb. 

Ştat hakimiyyəti ABŞ administrasiyasının sərhədi lazımi şəkildə qorumadığını və bunun qeyri-qanuni miqrantların artmasına səbəb olduğunu bəyan edib. 

Texas miqrantları “Lone Star” əməliyyatının davamı kimi Vaşinqton, Nyu York və Çikaqo da daxil olmaqla Amerikanın böyük şəhərlərinə avtobuslarla göndərməyə başlayıb.

“Lone Star” əməliyyatı nədir?

“Lone Star” əməliyyatının əsası 2021-ci ildə Texas qubernatoru Qreq Abbott tərəfindən qoyulub. Səbəb Baydenin miqrasiya qanunlarını yumşaltmasından sonra Latın Amerikasından qeyri-qanuni miqrant axınının kəskin artması olub. 

Abbottun əmri ilə Texas hüquq-mühafizə orqanları Meksika ilə sərhədi müstəqil mühafizə etmək hüququ əldə edib. Bura tikanlı məftillərin çəkilməsi, habelə qaçqınların tutulması da daxil olub.

Əməliyyat zamanı Texas Milli Qvardiyası təxminən yarım milyon miqrantı saxlayıb, həmçinin 35 minə yaxın miqrantı həbs edib. 

ABŞ Demokrat Partiyasının tənqidlərinə cavab olaraq, Texas hakimiyyəti Demokrat siyasətçilərin rəhbərlik etdiyi ən böyük ştat və şəhərlərə qeyri-qanuni miqrantların olduğu avtobuslar göndərməyə başlayıb. 

Jurnalistlərin “Abbott avtobusları” adlandırdığı bu avtobuslar Nyu York, Çikaqo və Denver kimi şəhərlərdə humanitar böhranlara səbəb olub və Demokratlar arasında qəzəb doğurub.

Ümumilikdə, 2022-ci ildən bəri Texasdan ölkənin digər şəhərlərinə 102,1 min qanunsuz miqrant daşınıb.

Son hadisələr

Yanvarın 22-də Ali Məhkəmə Texasla mübahisədə Baydeni dəstəkləyib və ştatın təhlükəsizlik qüvvələrinin miqrantları ələ keçirmək hərəkətlərini konstitusiyaya zidd elan edib. 

Məhkəmə həmçinin federal hakimiyyət orqanlarına dövlət orqanlarının göstərişi ilə qurulan sərhəd maneələrini sökmək hüququ verib. 

Lakin Texas məhkəmənin qərarını yerinə yetirməkdən imtina edib.

Bundan əvvəl yanvarın 13-də Texas və Vaşinqton arasında qarşıdurma az qala İql-Pass ərazisində silahlı toqquşmaya çevrilib. 

Texas Milli Qvardiyası ABŞ Federal Sərhəd Patrulunun qeyri-qanuni miqrantların sonrakı qeydiyyat üçün göndərilməsindən əvvəl müvəqqəti saxlanma məntəqəsi kimi istifadə etdiyi Şelbi Siti Parkını faktiki olaraq ələ keçirib. 

Vaşinqton bunu dövlət sərhədinin ələ keçirilməsi kimi qiymətləndirib.

Yanvarın 23-də ABŞ Daxili İşlər Nazirliyi Texas Milli Qvardiyasına parkı tərk etməyi və federal təhlükəsizlik qüvvələrinə qaçqınlar üçün obyektə girişi təmin etməyi əmr edib, lakin qubernator Abbott cavab verib ki, Bayden Konqres tərəfindən qəbul edilmiş miqrasiya qanunlarını sədaqətlə yerinə yetirmək üçün verdiyi andı pozub.

Bayden isə Texas hakimiyyətinə ultimatum verib: “Miqrantlara qarşı bütün maneələri aradan qaldırın və sərhədi təmizləyin, əks halda Texas hakimiyyəti federal məhkəmə ilə və çox güman ki, münaqişənin hərbi yolla həlli ilə üzləşəcək”. 

Onlara qərar qəbul etmək üçün bir gün vaxt verilib.

Buna baxmayaraq, qubernator Abbott jurnalist Taker Karlsona verdiyi müsahibədə dövlət sərhədlərinin qeyri-qanuni miqrantlardan qorunması məsələsində federal hakimiyyət orqanları ilə münaqişəyə hazır olduğunu bildirib.

“Düşünürəm ki, gələn il yanvarın 20-nə qədər hər şey həll olunacaq, ümid edirəm ki, yeni prezident and içəcək, o, təkcə Texas sərhədi ilə bağlı deyil, bütün ölkə üçün immiqrasiya qanunlarını sərtləşdirəcək”, - Abbott bildirib.

Münaqişə necə başladı?  

Demokratlar və Respublikaçılar arasında münaqişə Ukraynaya görə meydana gəlib. Belə ki, münaqişə respublikaçılar Ukraynaya Amerika sərhədinin qorunmasına kömək etmək üçün nəzərdə tutulan vəsaitin bir hissəsinin yönləndirilməsini tələb etdikdən sonra baş verib.

Qeyd edək ki, ABŞ-ın keçmiş prezidenti Donald Tramp, ABŞ-nin BMT-dəki keçmiş səfiri Nikki Heyli, amerikalı iş adamı İlon Mask, eləcə də 25 ştatın respublikaçı qubernatorları Abbottu dəstəklədiklərini bəyan ediblər.

Murad Məmmədov