Ukrayna və Rusiya arasındakı müharibədə önə çıxan xüsuslardan biri də dronlardır.
Press-fakt.com xarici agentliklərə istinadən xəbər verir ki, bununla bağlı nüfuzlu “Popular Mechanics” jurnalında maraqlı məqalə dərc olunub və burada Türkiyə istehsalı “Bayraktar” PUA-larının rolu xüsusi qeyd edilib.

"Hazırda Ukrayna səmalarında əsl pilotsuz təyyarələr savaşı gedir",-deyə PUA eksperti, “Hərbi-dəniz təhlil mərkəzi” və “Yeni Amerika təhlükəsizliyi” mərkəzinin məsləhətçisi Samuel Bendett jurnala danışıb. Onun sözlərinə görə, Ukrayna müharibəsi hərbi və kommersiya pilotsuz uçuş aparatlarının bu qədər geniş istifadə olunduğu ilk genişmiqyaslı savaş sayıla bilər.
Məqalədə “KBLA ITC”, “Orion”, “Forpost”, “ZALA 421”, “Granat-4”, “Orlan-10”, “Orlan-30”, “E95”, " “Zastava”, “Tachyon” və” Eleron-3" kimi PUA-ların Ukraynada işə salındığı vurğulanıb.
“Popular Mechanics” Ukrayna müqavimətinin simvoluna və hətta ölkədə məşhur mahnının mövzusuna çevrilmiş Türkiyə istehsalı olan “TB2 Bayraktar” PUA-larına da geniş yer ayırıb.
“Onun Ukraynadakı uğuru heç də təəccüblü olmadı. Çünki əvvəlki münaqişələrdə də “Bayraktar”lar əsl effektiv döyüş pilotsuz təyyarəsi olduğunu sübuta yetirib. “Bayraktar” Liviyada Xəlif Xəftər qoşunlarına və Suriyada Rusiya cihazlarına qarşı mübarizədə nəzərəçarpacaq uğurlar əldə edib. 2020-ci ildə Azərbaycan bu aparatlarla yüzlərlə tankı məhv edib. “TB2 Bayraktar”ları dörd lazerlə idarə olunan “MAM-L” tank əleyhinə raketlə silahlanır. Bu hava döyüş maşınları Ukraynada Rusiyanın hava hücumundan müdafiə vasitələrini, yanacaq karvanlarını məhv edən, patrul gəmilərini batıran və Bryanskda neft anbarını yandıran dəhşətli silaha çevrilib”,-deyə məqalədə yazılıb.