Bu barədə “Semafor” portalı mənbələrə istinadən məlumat yayıb.

Portalın məlumatına görə, İsrail HƏMAS liderlərinə Yaxın Şərq ölkələrindən birinə: Əlcəzair, Qətər və ya Səudiyyə Ərəbistanına sığınmağa icazə verə bilər. 

Söhbət xüsusilə Qəzza zolağındakı hərəkatın lideri Yəhya Sinvar və HƏMAS-ın hərbi qanadının rəhbəri Məhəmməd əd-Deyfdən gedir.

Bəzi İsrail rəsmilərinin fikrincə, belə bir plan anklavda döyüşləri dayandırmaq üçün tədbirlər paketinin bir hissəsi ola bilər və bütün girovların azad edilməsini, yaraqlılar tərəfindən silahların təhvil verilməsini və Qəzzanın müharibədən sonrakı yeni rəhbərliyinin yaradılmasını əhatə edə bilər.

Eyni zamanda, ABŞ Prezidenti Co Bayden administrasiyası ilə bu planı müzakirə edən ərəb ölkələrinin nümayəndələri Fələstin hərəkatının rəhbərliyinin “sürgünə getməyə” razılaşacağına şübhə edirlər.

“Semafor”un ərəb mənbələri qeyd edirlər ki, hərəkatın bəzi liderləri üçüncü ərəb ölkəsinə sığınmaqdansa, döyüş meydanında ölməyi üstün tuturlar.